Білім бөлімі басшысымен кездесу

Жуырда кезекті рет білім бөлімінің басшысы Раушан Пернешқызы №49 мектеп-гимназияның жұмысымен танысты.

Мектеп ғимаратының ішкі және сыртқы жағдайы зерделенді, материалдық-техникалық базасы таныстырылды.

1176 орынға арналған мектеп 1991 жылы пайдалануға берілген. 

Қазіргі таңда мекемеде 1961 оқушыға  176 педагог білім беруде.

“Тәрбие оңалмай, білім оңалмайды” ұстанымымен тер төгіп келе жатқан мектеп ұжымының жұмысын бөлім басшысы жоғары бағалады.

Оған дәлел мектеп-гимназия шәкірттерінің жетістіктері, білім сапасының көрсеткіші. 

Сонымен қатар мектеп-гимназияда қосымша үйірме жұмысы жүргізіліп келеді. Жуырда республикалық деңгейде өткізілген волейболдан ұлттық мектеп лигасында аталған білім ошағының командасы жүлделі ІІ орынмен оралды.

2020 жылы аталған білім ордасының шатыры, қаскелбеті күрделі жөндеуден өткен. Ағымдағы жылы терезе блоктарын ауыстыруға қаражат бөлініп, жөндеу жұмыстары маусым-шілде айларында атқарылады деп жоспарлануда.